Ushtarët e Kosovës po ngritin për herë të parë flamurin shtetëror, në një mision paqeruajtës ndërkombëtar.
Ngjarja historike ndodhi në bazën e ushtrisë së Shteteve të Bashkuara të Amerikës në Kuvajt, në qershorin e vitit 2021.
Por ushtarët e Forcës së shpejti mund të bëhen pjesë e misioneve të tjera ndërkombëtare.
Kjo nëse Kosova anëtarësohet në aleancën më të madhe ushtarake në botë, NATO.
Madje ministri i Mbrojtjes, Ejup Maqedonci në Tëvë 1 pati thënë se kjo mund të ndodhë së shpejti.
“Unë besoj që në një periudhë të shkurtër pa dhënë ndonjë datë a po vite të caktuar Kosova do të jetë pjesë e NATO-s…”, deklaroi Maqedonci.
E sipas analistit nga Shqipëria, Ben Andoni, anëtarësimi i FSK-së në NATO , mund të vijë në vitin e ardhshëm.
“Finalizimi i ka dy elemente, një element shumë i madh që po thuhet është se në rast që do të ruhet kjo status kohe, ka shumë të ngjarë që Kosova në vitin 2027 në Samitin që do të bëhet në Tiranë, Kosova të anëtarësohet dhe ky do të jetë lajmi më i jashtëzakonshëm i këtij samiti dhe fakti që ky samiti do të jetë mes shqiptarëve kur thuhet në Tiranë është njësoj sikurse thua në Prishtinë”, tha ai.
Por kjo, ka disa sfida sipas tij.
“Ne dimë që Kosova vërtetë i ka të precizuara kufijtë, por vendi fqinj që është në procesin e dialogut kufirin që e ndanë me Kosovën e quan kufi administrativ do të thotë që akoma Serbia me Kosovën nuk e kanë zgjedhur problemin me demarkacionit”.
Edhe sipas ekspertit të sigurisë, gjasat e Kosovë për tu anëtarësuar në këtë aleancë ushtarake janë të mëdha, por kjo varet prej disa rrethanave.
“Varët prej politikës së brendshme e cila do të dije të shfrytëzojë këto mundësi që i janë ofruar tani në kuptimin gjeostrategjik dhe politikës ndërkombëtare. Një veprim i drejtë dhe korrekt i politkës së Republikës së Kosovës i jep mundësin që të përshpejtohen hapat për integrim në NATO. Ne e dimë që janë disa shtete që ende nuk e njohin Republikën e Kosovës si shtet dhe janë pjesë e NATO dhe ato mund të shkaktojnë vështirësi”, tha eksperti i sigurisë, Hysen Gecaj.
Në vitin 2024, Republika e Kosovës, përkatësisht Kuvendi i Kosovës, e ka avancuar statusin e tij në Asamblenë Parlamentare të NATO-s nga anëtar vëzhgues në anëtar të asociuar.
