Avokati, Shkëlzen Sopjani ka vlerësuar se nëse muajt e ardhshëm do të mbaheshin zgjedhje të reja, Albin Kurti dhe Lëvizja Vetëvendosje janë ata që më së paku do t’i frikësoheshin procesit zgjedhor.
Sopjani, në emisionin “Ditari” në Tëvë1, ka thënë se ky komoditet i VV-së dhe Kurtit vjen si pasojë e opozitës së dobët dhe mungesës së lidershipit të fortë nga udhëheqësit opozitarë.
Ai ka shtuar se edhe për shkak të përçarjeve brenda partive opozitare, VV nuk ka arsye reale të frikësohet nga zgjedhjet, dhe numrat që ka aktualisht mund të mbeten të njëjtë, madje të shtohen pak.
“Në dy palë zgjedhjet e fundit që patëm, opozita nuk pati ndonjë strategji apo plan të mirëfilltë për të rritur numrat e saj, dhe besoj se edhe një kohë të gjatë nuk do të kenë. Prandaj, më së paku që i frikësohet zgjedhjeve është Albin Kurti dhe Lëvizja Vetëvendosje, dhe kjo falë opozitës së dobët dhe mungesës së lidershipit nga udhëheqësit opozitarë. Po shohim se disa prej tyre tentojnë të dalin më aktivë dhe të tregohen më ‘mangup’, por ashtu si në zgjedhjet e kaluara, kjo nuk pritet t’u sjellë rezultat. Kur ia shtojmë edhe përçarjet që nuk janë shumë të dukshme në publik brenda partive opozitare, është e qartë se VV nuk ka arsye reale të frikësohet nga zgjedhjet. Numrat që ka aktualisht, nëse zgjedhjet do të mbaheshin në muajt në vijim, besoj se do t’i ketë prapë, madje mund të shtonte edhe ndonjë”, ka thënë Sopjani.
