Kryetari i Aleancës për Ardhmërinë e Kosovës (AAK), Ramush Haradinaj, në 37-vjetorin e Grevës së Minatorëve të Trepçës, ka vlerësuar këtë ngjarje si një akt të guximshëm dhe moment kthese në rrugën drejt lirisë.
Haradinaj ka kujtuar veprën e më shumë se 1300 minatorëve që morën pjesë në grevën e vitit 1989, duke theksuar se ajo u shndërrua në një rezistencë gjithëpopullore që, sipas tij, lëkundi themelet e shtetit të atëhershëm të Jugosllavisë.
“Grevat e Minatorëve ishin akte të guximshme dhe momente kthese në rrugën tonë drejt lirisë. Sot, në shënim të 37-vjetorit të Grevës së Minatorëve, me nderim kujtuam veprën e më shumë se 1300 minatorëve të asaj kohe. Kjo grevë u shndërrua në një rezistencë gjithëpopullore, duke lëkundur themelet e shtetit të atëhershëm të Jugosllavisë”, ka shkruar ai në Facebook.
Ai ka shtuar se mënyra më e mirë për të nderuar sakrificën e minatorëve ishte fuqizimi i Trepçës si aset ekonomik i vendit.
“Gjatë mandatit tim si kryeministër i vendit, në mars të vitit 2019, me votimin e Statutit të “Trepçës” e regjistruam si kompani në bazë të ligjeve të Kosovës. Ky ishte hap kyç për t’i dhënë këtij aseti fuqinë për investime dhe gjenerim stabil të të hyrave, punësim dhe për ta rikthyer atë në funksion të plotë të ekonomisë së vendit, të shtetit të Kosovës dhe të minatorëve”, ka shtuar Haradinaj.
Në fund, ai ka shprehur mirënjohje për minatorët e asaj kohe për guximin dhe sakrificën e tyre, si dhe për minatorët e sotëm për angazhimin e vazhdueshëm në zhvillimin e Trepçës dhe ekonomisë së vendit.
