Komuna e Obiliqit ka njoftuar se Drejtoria e Mjedisit ka nisur zbatimin e vendimit që ka hyrë në fuqi më 15 shkurt 2026, i cili ndalon hedhjen e mbeturinave në vende të palejuara.
Pas paralajmërimeve të përsëritura për marrjen e masave ndëshkuese ndaj shkelësve, sot në fshatin Palaj është evidentuar një qytetar duke hedhur mbeturina në mënyrë të kundërligjshme.
Në përputhje me legjislacionin në fuqi, ndaj tij është shqiptuar një gjobë prej 1 mijë eurosh nga Drejtoria e Mjedisit.
“Institucionet komunale mbeten të përkushtuara në zbatimin e ligjit dhe u bëjnë thirrje të gjithë qytetarëve që të respektojnë rregullat për mbrojtjen e mjedisit dhe ruajtjen e pastërtisë publike”, theksohet në njoftim.
