Rafet Llapashtica nga OVL-UÇK ka deklaruar se është i bindur që verdikti përfundimtar në procesin gjyqësor ndaj ish-krerëve të Ushtrisë Çlirimtare të Kosovës do të jetë lirues.
Në emisionin “Ditari” në Tëvë1, Llapashtica ka thënë se procesi gjyqësor ka qenë i stërzgjatur dhe se gjatë kësaj periudhe janë paraqitur të gjitha provat dhe dëshmitë.
“Mirë që i erdhi fundi një procesi të stërgjatur. Gjatë kësaj periudhe të gjykimit të ish-drejtuesve të UÇK-së, kemi parë gjithçka: deklarimet përfundimtare të tyre, mbrojtjen e tyre, dëshmitarët mbrojtës, si dhe akuzat. Ne besojmë që aktgjykimi do të jetë lirues për drejtuesit e UÇK-së, sepse edhe mbrojtësi i viktimave në fjalën e tij përfundimtare theksoi se askund në aktakuzë viktimat nuk lidhen drejtpërdrejt me të akuzuarit. Kjo tregon se gjykata ka nxjerrë në skenë të gjitha çështjet e fshehura, të cilat mund të kishin shkaktuar dëme Kosovës në të ardhmen.Nëse përdoren drejtësia, argumentet dhe faktet, vendimi do të jetë lirues”, ka deklaruar ai.
Ky proces përfaqëson, siç u shpreh ai, “garën e fundit” të Kosovës me shtetin serb, duke shtuar se beson që edhe këtë herë do ta fitojnë, ashtu siç, sipas tij, UÇK-ja fitoi luftën për liri dhe pavarësi.
“Ne besojmë në drejtësi, dhe nëse përdoren drejtësia, argumentet dhe faktet, aktgjykimi do të jetë lirues, ashtu siç ka qenë çdo fitore e UÇK-së deri në arritjen e lirisë dhe pavarësisë së Kosovës. Kjo do të jetë gara jonë e fundit me shtetin serb, por sigurisht që edhe këtë betejë do ta fitojmë, sepse kemi bërë një luftë të drejtë çlirimtare dhe nuk kemi kryer krime,” ka përfunduar ai.
Ndryshe, çështja gjyqësore kundër ish-eprorëve të Ushtrisë Çlirimtare të Kosovës në Dhomat e Specializuara të Kosovës në qytetin holandez, Hagë, ka përfunduar më 18 shkurt, pas gati tri vjetëve.
Thaçi, Veseli, Krasniqi e Selimi, secili, ngulën këmbë në fjalët e tyre përmbyllëse se ndihen tërësisht të pafajshëm dhe mbrojtën luftën e Ushtrisë Çlirimtare të Kosovës si të drejtë dhe për çlirimin e një populli që po përballej me një luftë agresore.
Ata thanë se nuk kanë kryer krime dhe se Prokuroria nuk ka mundur t’i arsyetojë akuzat, siç thanë, të pabazuara, kundër tyre./teve1.info/
