Skitarja e Kosovës, Kiana Kryeziu doli nga shtegu edhe në garën e tretë të saj në Lojërat Olimpike Dimërore “Milano-Cortina 2026”.
Të mërkurën, në garën e sllallomit, Kryeziu nuk arriti ta përfundojë sikurse edhe dy garat e tjera në këtë ngjarje.
Këtë herë, Kryeziu doli nga shtegu në fillim të garës duke i dhënë fund paraqitjes së saj në Lojërat Olimpike Dimërore të këtij viti.
Kryeziu ditë më parë, garoi edhe në disiplinat tjera të skijimit alpin, Super G dhe sllallom të madh, në të cilat gjithashtu doli nga shtegu.
Nga shtegu doli edhe skitari Drin Kokaj, i cili u paraqit në garën e sllallomit në “Milano-Cortina 2026″.
Kokaj e Kryeziu ishin garuesit që përfaqësuan Kosovën në Olimpiadën Dimërore të këtij viti, por që paraqitja e tyre mbetet për t’u harruar.
Kosova për herën e tretë mori pjesë në Lojërat Olimpike Dimërore, ku Kryeziu u paraqit për herën e dytë në këtë ngjarje, ndërsa Kokaj bëri debutimin e tij.
