Krerët e shtetit të Kosovës, presidentja Vjosa Osmani, kryetarja e Kuvendit Albulena Haxhiu e kryeministri Albin Kurti kanë uruar qytetarët me rastin e 18-vjetorit të shpalljes së Pavarësisë.
Pas ceremonisë së ngritjes së flamurit në oborrin e Qeverisë, ata poashtu kanë kujtuar breza të tërë që sakrifikuan për liri e pavarësi.
Presidentja Vjosa Osmani tha se sakrifica e breza të tërë e cila kulmoi me luftën e UÇK-së, ka forcuar rrugën e Kosovës drejt Bashkimit Evropian, aty ku siç tha ajo është synimi i vendit.
“Sot bëhemi bashkë për të festuar përvjetorin e shtetit tonë, i cili tash po hynë në moshën e pjekurisë dhe bëhemi bashkë për të kujtuar gjithë ata që sakrifikuan gjithçka në mënyrë që ne ta gëzojmë shtetin. Është kjo sakrificë që ka trasuar rrugën tonë përpara, drejt forcimit të shtetit tonë në rrugën euroatlantike ky aty kemi synime dhe vendin”, tha Osmani.
Kryetarja e Kuvendit Albulena Haxhiu, duke kujtuar e nderuar dëshmorët dhe martirët e kombit, tha se pavarësia nderohet me institucione funksionale që punojnë me integritet dhe profesionalizëm.
“Kujtojmë me gjithë respekt ata që dhanë jetën për pavarësinë që sot e gëzojmë, pra dëshmorët e kombit dhe martirët, por edhe figura që dhanë kontributin në kohë të ndryshme. Pavarësinë e nderojmë nëse punojmë me institucione funksionale që punojë me integritet dhe profesionalizëm”, tha ajo.
Kryeministri Albin Kurti tha se Kosova po forcohet si shtet e bashkë me të edhe ekonomia e mirëqenia e qytetarëve.
Ai tha se shtetit i Kosovës lindi para 18 vitesh, por lindi i pjekur për shkak se shumë breza kontribuan në lirinë dhe pavarësinë e vendit.
“Kosova po rritet, po rritet numri i njohjeve të shtetësisë, ekonomia e vendit, mirëqenia e qytetarëve, po rritet fuqia e shtetit. Para 18 vjetëve lindi Pavarësia e Kosovës, por lindi e pjekur, meqenëse shumë breza të veprimtarëve kanë kontribuar e sakrifikuar që ne të jemi të lirë dhe të pavarur, të kemi shtet demokratik e sovran. Sot festojmë dhe njëkohësisht nderojmë, rezistencën paqësore, kryengritjet e armatosura të cilat kulmuan me luftën e drejtë të UÇK-së”, u shpreh Kuri.
