Katër shoferë janë gjobitur në Ferizaj për tejkalim të shpejtësisë në një zonë ku kufizimi ishte 50 km/h.
Sipas njoftimit të policisë, secilit prej tyre i është shqiptuar gjobë prej 200 euro, i janë vendosur nga dy pikë negative si dhe u është pezulluar patentë shoferi për tre muaj.
Shkeljet janë evidentuar nga patrulla e Njësisë së Komunikacionit Rrugor gjatë kontrolleve në rrugën “Brahim Ademi”.
Një 34-vjeçar me veturë Audi A4 është kapur duke lëvizur me 103 km/h, ndërsa një 33-vjeçar me VW Golf është ndaluar me 87 km/h.
Po ashtu, një 35-vjeçar që drejtonte një Land Rover dhe një 37-vjeçare me Audi A4 janë regjistruar duke qarkulluar me 83 km/h në të njëjtën zonë.
Policia ka bërë thirrje për respektim të rregullave të trafikut, duke theksuar se kontrollet do të vazhdojnë me qëllim rritjen e sigurisë në rrugë.
