Një zjarr është raportuar mbrëmjen e kaluar në një objekt në Prishtinë, konkretisht në rrugën “Dritan Hoxha”, aty ku aktualisht ndodhen zyrat e Agjencisë Kosovare të Privatizimit.
Sipas zëvendëskomandantit të Brigadës së Zjarrfikësve të Prishtinës, Abdulsamed Shkodrës, nga objekti vazhdon të dalë tym, megjithatë nuk ka rrezik për qytetarët.
Ai bëri të ditur se ekipet e zjarrfikësve po hasin vështirësi për të depërtuar në bodrumin e ndërtesës, për shkak të qasjes së kufizuar dhe strukturës së brendshme me kthesa të shumta.
Shkodra theksoi se shkaku i zjarrit ende nuk është përcaktuar
. Sipas informacioneve fillestare, dyshohet se mund të jenë përfshirë nga flakët mbeturina apo materiale të vjetra arkivore, përfshirë dokumente të periudhës së paraluftës, por kjo mbetet për t’u verifikuar pas inspektimit të plotë të vendit të ngjarjes.
Rastin e ka konfirmuar edhe Policia në Prishtinë. Zëdhënësi Enis Pllana ka bërë të ditur se nga ky incident nuk raportohet për persona të lënduar. /teve1.info/
