Grupi për Studime Juridike dhe Politike (GLPS) ka organizuar sot një konferencë për media me temën “Pesë prioritete për Këshillin Prokurorial të Kosovës”, ku paraqiti rekomandime konkrete për përmirësimin dhe konsolidimin e funksionimit të këtij institucioni.
Gjatë konferencës, Liridon Salihu nga GLPS theksoi se pas ndryshimeve ligjore që kanë hyrë në fuqi lidhur me përbërjen e Këshillit Prokurorial dhe zhvillimeve të fundit në kuadër të reformës në sistemin prokurorial, KPK duhet të përqendrohet në pesë prioritete kyçe.
“Mbajtja e mbledhjes dhe miratimi i Rregullores për zgjedhjen e Kryesuesit dhe Zëvendëskryesuesit të KPK-së, zgjedhja e Kryesuesit dhe Zëvendëskryesuesit, shpallja e konkursit për pozitën e Kryeprokurorit të Shtetit, ndryshimi dhe plotësimi i Rregullores për zgjedhjen e anëtarëve prokurorë dhe zgjedhja e anëtarëve të rinj të KPK-së, si dhe rritja e transparencës dhe llogaridhënies institucionale,” tha Salihu.
GLPS vlerëson se zbatimi i këtyre prioriteteve, në bashkëpunim me qasjen e re të Këshillit ndaj publikut, shoqërisë civile dhe partnerëve ndërkombëtarë, do të përbënte një hap të rëndësishëm drejt konsolidimit institucional të KPK-së dhe përmbushjes së detyrimeve ligjore për një sistem prokurorial më efikas./teve1.info/
