Ka vazhduar të premten deklarimi i mbrojtjes së Rexhep Selimit në Dhomat e Specializuara në Hagë.
Avokati i tij, Geoffrey Roberts tha se provat e parashtruara nga ZPS janë kontradiktore dhe jo të besueshme.
Sipas avokatit tjetër, Eric Tully, ZPS në asnjë moment nuk e ka bërë të qartë argumentet e veta për autorësinë e materialeve që iu atribuuan Selimit.
“Dëshmitarëve iu treguan faqe individuale në një mënyrë të dyshimtë gjatë gjykimit por pa u gjetur kush ishte autori i këtyre materialeve. Praktika strategjike e Prokurorisë në fakt është e qëllimshme në mënyrë që ta linte mbrojtjen pezull deri në fund të gjykimit që mbrojtja të gjendej në një moment të vështirë që të mos dinte se çfarë të bënte me dokumentet në fjalë dhe i vetmi refren që përsërisin ishte se këto janë sekuestruar prej Selimit”, deklaroi avokati i Rexhep Selimit, Eric Tully.
Ai shtoi se Prokuroria duket se nuk është e vendosur sa i takon përshkrimit të autoritetit të Selimit.
Tully hodhi poshtë pretendimet e Prokurorisë Speciale se Rexhep Selimi themeloi policinë ushtarake në prill të 1999.
“Mendoni se sa i rëndësishëm është rolit i shefit operativ të policisë së një vendi në një situatë jashtë konflikti në Kosovë në qershor 1999. Kjo do të ishte një detyrë herkulane, minimalisht duhet të kishim pritur urdhra, udhëzime që të buroni prej këtij komandanti operativ drejtuar vartësve, por s’kemi parë asnjë të tillë. Asnjë shembull të ndonjë urdhri, një udhëzimi, në asnjë moment, asnjë policie, në asnjë zonë të Kosovës as nuk është lëshuar nga Selimi, dhe as në emër të zotit Selimi”.
Po këtë ditë, pas përfundimit të deklaratave përmbyllëse nga mbrojtja e Selimit, nisi deklarimin edhe mbrojtja e Jakup Krasniqit.
Avokatja e tij deklaroi se akuza ndaj Krasniqit nuk do duhej ngritur fare, pasi ZPS po vazhdon t’i qëndrojë prapa qëndrimit të vetë fals dhe të pambështetur.
“Kjo është një akuzë që nuk do të duhej që të ishte ngritur fare dhe kur u ngrit ZPS humbi tre mundësi për të analizuar më mirë qëndrimin e saj. Ne parashtrojmë që ZPS duhet ta kishte tërhequr këtë akuzë në një fazë shumë të më të hershme, por ajo nuk e bëri një gjë të tillë”.
Sipas saj, emri i tij përdoret nga ZPS për ngjarje e incidente të pretenduara ku klienti i saj nuk ka fare lidhje.
“Një element tjetër i çuditshëm në dosjen e prokurorisë është që në mënyrë të vazhdueshme i mbyll sytë përpara çdo prove që nuk i përshtatet narratives së prokurorisë, ZPS as nuk e pranoi ekzistencën e provave shfajësuese”, deklaroi avokati i Krasniqit, Venkatesari Alagendra.
Sot është dita e pestë prej kur kanë nisur deklaratat përmbyllëse të palëve.
Kjo fazë ka nisur me parashtrimet e Zyrës së Prokurorit të Specializuar, ku kryeprokurorja Kimberly Uest ka kërkuar dënim me burgim nga 45 vjet për katërshen e UÇK-së.
