Janë momentet e fundit para se të hyjnë në Gjykatën Speciale.
Pas pak, do ta ndjekin nga afër, seancën ku ish-komandantët e tyre, po gjykohen për krime lufte.
Por, para se të futen në gjykatore, këta qytetarë nga Skenderaj, u kujdesen ta ruajnë një kujtim të veçantë.
Njëri nga ta, është Xhevat Dervishi, nipi i heroinës nga Prekazi, Salë Jasharit.
“Është hera e parë pas pesë vitesh që na mundësohet me i pa këta njerëz që kanë kontribuar për vendin dhe që këta kanë bërë një luftë të drejtë dhe të pastër për lirinë e vendit… Nëse ka drejtësi në këtë botë dhe në këtë gjykatë, këta do të jenë të pafajshëm”, shprehet Xhevat Dervishi- nipi i Salë Jasharit
Takimin e radhës me ish-krerët e UCK-së, Dervishi shpreson ta kenë në liri.
“Është një gjyq që po mbart larg Kosovës edhe ua pamundëson shumë qytetarëve të marrin pjesë… Nuk kemi mundur të qëndrojmë atje {Kosovë} dhe kemi ardhur me i pa këta njerëz që kanë luftuar për vendin e tyre dhe kanë sjell lirinë e vendit të tyre”, shprehet ai.
E shumicën e seancave në rastin “Thaçi dhe të tjerët” thotë t’i ketë përcjellë Fitim Gjoshi.
Por, edhe për ish-pjesëtarin e Brigadës 113 “Mujë Krasniqi”, kjo do të jetë hera e parë që seancën do ta përcjell nga afër.
“Mbi 70 për qind të seancave i kam përcjellur, besoj qe deri në fund do të vi që t’i përcjelli për hir të respektit dhe nderit ndaj çlirimtarëve tanë qe po sakrifikohen për vendin tonë, për këtë shtet qe e themeluan dhe e arritën qëllimin qe të jemi në liri”, thotw Fitim Gjoshi, ish-ushtar.
Shpresat që do të lirohen ish-krerët e UÇK-së, i ka edhe Gjoshi.
Por, nuk beson shumë në drejtësinë e Hagës.
“Deri në momentin që të dalin prej këtu nuk ju besohet sepse nuk ka drejtësi këtu. Kjo është gjykatë politike dhe aspak nuk ka drejtësi. Por shpresat sipas deklaratave të avokatëve qe do të triumfojë drejtësia. Janë të pastër”, shprehet ai.
Ndryshe, Në Dhomat e Specializuara nga e hëna kanë filluar deklaratat përmbyllëse të palëve në procesin më të madh gjyqësor në Hagë.
