Kryetari i Lidhjes Demokratike të Kosovës, Lumir Abdixhiku, ka shprehur gatishmërinë e subjektit të tij për bashkëpunim institucional në Kuvendin e Kosovës për tema që tejkalojnë aritmetikën parlamentare.
Abdixhiku ka thënë se vullneti qytetar ka folur qartë, ka ndarë rolet dhe përgjegjësitë, dhe e ka vendosur LDK-në në opozitë.
“LDK shpreh gatishmërinë për bashkëpunim institucional në parlament për tema që tejkalojnë aritmetikën parlamentare, sepse besojmë se stabiliteti i shtetit dhe besimi i qytetarëve ndërtohet me maturi dhe respekt për opozitën. Demokracia nuk është vetëm çështje numrash, por një çështje e kulturës politike. Ky është momenti kur fjala e qytetarëve bëhet barrë e përfaqësimit, dhe politika duhet të ndalojë së foluri vetëm për veten, duke nisur të flasë për qytetarët dhe sfidat që i presin ata. Këto sfida janë të shumta dhe nuk presin. Vullneti qytetar ka folur qartë, ka ndarë role dhe përgjegjësi, dhe ky vullnet e ka vendosur LDK-në në opozitë,” ka thënë ai.
Ai ka shtuar se të qëndrosh përballë pushtetit nuk do të thotë kundërshtim i verbër, por mbrojtje e shtetit nga tundimi i pushtetit për të mos pasur kufij.
“Të qëndrosh përballë këtij pushteti nuk do të thotë kundërshtim i verbër për hir të kundërshtimit. Do të thotë mbrojtje e shtetit nga tundimi i pushtetit për të mos pasur kufi, ruajtje e hapësirës ku fjala e lirë thuhet pa frikë, dhe ku shteti nuk shndërrohet në zgjatim të një force të vetme politike. Në këtë kuptim, qëndrimi përballë pushtetit që ka gjithçka është mënyra e vetme për të ruajtur atë që nuk duhet të ketë askush i vetëm, pra fatin e Republikës së Kosovës. Ky fat kërkon qëndrime të pakompromista nga ne”, ka theksuar Abdixhiku./teve1.info/
