Analisti, Muhamet Bytyçi ka deklaruar se Gjykata Speciale në Hagë, është një gjykatë politike e cila sipas tij, nuk ka për qëllim të ndajë drejtësi.
I ftuar në emisionin “Ditari” në Tëvë1, Bytyçi tha se në Hagë po mbahen themeluesit e shtetit të Kosovës, të cilëve siç tha ai, padrejtësia 5-vjeçare është urgjente që t’i vijë fundi dhe të kenë lirim sa më të shpejtë.
“Gjykata Speciale e ka treguar që është një Gjykatë politike e cila nuk ka fare qëllim të ndajë drejtësi, por më shumë ka për qëllim t’i jap një kahje tjetër mbase idesë së çlirimit e deri te shtetit të Kosovës , sepse siç e dimë në Hagë po mbahen themeluesit e shtetit të Kosovës dhe padrejtësia 5-vjeçare është mbase urgjente t’i vije fundi dhe të kemi një lirim sa më të shpejt të atyre që po mbahen padrejtësisht atje dhe sigurisht që i gëzohemi edhe lirimit të sotshëm të disa të mbajturve të cilët padrejtësisht me akuza krejtësisht koti janë mbajtur një vend ku më së paku duhet të jenë ata, sepse ata janë çlirimtarë dhe çlirimtarët duhet të jenë në liri bashkë me njerëzit të cilët e gëzojnë sot lirinë”, ka deklaruar Bytyçi në emisionin “Ditari” në Tëvë1.
Ndërkohë, për seancën e nesërme e cila pritet të mbahet për konstituimin e Kuvendit të Kosovës, Bytyçi ka theksuar se është urgjente që Kosova të ketë institucione ligjitime demokratike dhe të merret përgjegjësia për të avancuar politikat qeveritare dhe kërkesat e shtetit.
Sipas tij, procesi zgjedhor ka pasur shumë defekte, ku pjesëmarrja e Listës Serbe ishte një lojë e pastër politike, duke theksuar se përfaqësuesit e LVV dhe të tjerë që abstenuan, kanë qenë të vetëdijshëm që PZAP do ta rrëzonte vendimin e tyre dhe çështja do të kthehej nga fillimi.
Bytyçi ka shtuar se nëse ka vullnet politik, Kuvendi mund të konstituohet edhe nesër.
“Ka qenë moti urgjente që sa më shpejt të kemi institucione legjitime demokratike dhe të marrë përgjegjësinë në këtë rast fituesi i zgjedhjeve, për të quar përpara politikat qeveritare dhe kërkesat që i ka shteti i Kosovës, ne e kemi pa një proces zgjedhor me shumë defekte, pjesa me Listën Serbe ka qenë lojë e pastër politike sepse edhe përfaqësuesit e LVV dhe të tjerët të cilët kanë abstenuar e kanë ditë që PZAP do ta rrëzojë vendimin e tyre dhe prape do të kthehet çështja nga fillimi. Nëse ka vullnet politik nesër Kuvendi mund të konstituohet”, ka shtuar ai në fund./teve1.info/
