Edhe në këtë sezon, një gjë mbetet e pandryshuar te FC Baseli, roli vendimtar i Xherdan Shaqirit. Edhe pse nuk po arrin plotësisht nivelin e jashtëzakonshëm të sezonit të kaluar kampion, mesfushori ofensiv vazhdon të jetë “jeta” e skuadrës së Baselit.
Shaqiri është i përfshirë drejtpërdrejt në më shumë se gjysmën e golave të shënuar nga “Bebbi” këtë sezon, një statistikë që flet qartë për varësinë e kampionëve në fuqi nga ish-lojtari i kombëtares zvicerane. Kontributi i tij, qoftë me gola apo asistime, mbetet vendimtar në ecurinë e skuadrës.
Për Baselin është fat i madh që ka në radhët e veta një futbollist të tillë, me eksperiencë dhe cilësi të lartë individuale. Megjithatë, kjo statistikë njëkohësisht ngre edhe alarmin: në momentin që Shaqiri mungon, Baseli përballet me probleme serioze në fazën ofensive.
Kampionët aktualë kanë treguar se pa liderin e tyre kryesor e kanë të vështirë të gjejnë zgjidhje dhe kreativitet në lojë.
Shaqiri është lojtari që ka kontribuuar më së shumti me gola e asistime, nga të gjithë lojtarët e kampionatit zviceran.
Në 21 ndeshje, Shaqa i ka realizuar nëntë gola, por ka bërë edhe 10 asistime, pra një kontribut prej 19 golave në këtë sezon deri më tani, që është më së shumti te skuadra e tij dhe në ligë. 34 gola i ka shënuar Baseli në këtë edicion dhe 19 prej tyre mbajnë vulën e Shaqirit, me një përqindje të pjesëmarrjes prej 55.9 për qind, që është më larta në ligë.
Dy javë më parë ai realizoi hetrik dhe asistoi njëherë për ta vendosur i vetëm derbin ndaj Zurichut.
