Agjencia e Ushqimit dhe Veterinarisë (AUV) ka njoftuar opinionin publik se, bazuar në një njoftim zyrtar të pranuar nga Republika e Shqipërisë, përkatësisht nga Autoriteti Kombëtar i Ushqimit, është konstatuar eksportimi në Republikën e Kosovës i një produkti ushqimor për foshnja që nuk i plotëson kriteret e sigurisë.
Sipas AUV-së, subjekti “Rossmann & LALA SH.P.K.” në Shqipëri ka eksportuar produktin ushqimor për foshnja BEBA SUPREM PRE, 800 gram, me datë skadimi 05.2027 dhe kod identifikues EAN: 7613287226631, i cili është importuar në Kosovë nga kompania Rossmann Kosova.
Agjencia bën të ditur se, në bashkëpunim me kompaninë përkatëse, është realizuar bllokimi i menjëhershëm i këtij produkti dhe se në ditët në vijim do të fillojë procesi i asgjësimit, në përputhje me legjislacionin në fuqi.
“Pavarësisht sfidave me të cilat po përballet, përfshirë mungesën e inspektorëve, Agjencia e Ushqimit dhe Veterinarisë mbetet e përkushtuar në monitorimin e vazhdueshëm të tregut dhe të zinxhirit ushqimor, me qëllim të garantimit që konsumatorët në Republikën e Kosovës të kenë në dispozicion ushqim të sigurt dhe të shëndetshëm”, thuhet në njoftimin e tyre në Facebook.
AUV ka theksuar se mbetet e përkushtuar në mbrojtjen e shëndetit publik dhe në garantimin e sigurisë ushqimore për konsumatorët në Republikën e Kosovës.
