Sot pas mesnate, Policia e Kaçanikut ka arrestuar dy persona në flagrancë që po tentonin të thyenin dritaren e një artarie në rrugën “Ismail Raka”. Bëhet fjalë për shtetasit serbë M.M. (36 vjeç) dhe D.T. (35 vjeç), të dyshuar për veprën penale “Tentim vjedhje e rëndë”.
Në të njëjtën kohë, një patrullë tjetër ndaloi një veturë me targa vendore, ku ndodheshin tre shtetas kosovarë: L.M. (48 vjeç), B.H. (42 vjeç) dhe R.F. (28 vjeç), të cilët u shoqëruan në stacion policor.
Në vendngjarje, Njësia e Hetimeve konfiskoi mjete të dyshuara për kryerjen e vjedhjes, përfshirë hebel, dana, çelësa të ndryshëm, kaçavida, skalpër dhe doreza. Gjatë kontrollit, të dyshuarve iu gjetën edhe çelësat e një veture VW Caddy të parkuar afër vendit të ngjarjes.
Të dyshuarit u intervistuan në prani të avokatëve dhe përkthyesit, ndërsa dy prej tyre pranuan përfshirjen në rast. Me urdhër të prokurorit, pesë personat janë dërguar në mbajtje për 48 orë për procedura të mëtejshme hetimore.
Policia e Rajonit të Ferizajt fton qytetarët të raportojnë çdo veprim të dyshimtë në numrin 192 ose përmes platformës digjitale “Lajmëro Policinë”.
