Kontingjenti i Forcës së Sigurisë së Kosovës (FSK) me kapacitete mjekësore ROL 1, që nga 24 janari, i është bashkuar ushtrive partnere të NATO-s në Ushtrimin Fushor “KFOR 36”, i cili po zhvillohet në Qendrën e Trajnimit JMRC Hohenfels në Gjermani.
Sipas njoftimit zyrtar, FSK në këtë ushtrim është duke ofruar mbështetje reale mjekësore për të gjitha ushtritë pjesëmarrëse, në bashkëpunim të ngushtë me shërbimin mjekësor të Ushtrisë së Shteteve të Bashkuara të Amerikës.
Po ashtu, thuhet se Forca e Sigurisë së Kosovës po merr pjesë në trajnime të fushave specialistike dhe është e përfshirë në skenarët e ushtrimit “KFOR 36”, me synim shkëmbimin e përvojave profesionale dhe rritjen e ndërveprueshmërisë me partnerët ndërkombëtarë.
“Gjatë kësaj kohe, janë duke realizuar trajnime dhe duke ofruar ligjërata në fushën e mjekësisë në bashkëpunim me personelin e ushtrisë amerikane për pjesëmarrësit e ushtrive partnere në ushtrim. Ligjëratat janë të fokusuara në temat: Prezantimi i PSO ROL 1 (Nivelin bazë të mbështetjes mjekësore në operacione ushtarake), Evakuimi mjekësor, Combat Life Saver (CLS), Shëndeti mendor, Menaxhimi i lëndimeve dhe qepja e plagëve (sutura), Menaxhimi i traumave të kokës, Marrja e mostrave të gjakut për laborator emergjent dhe vendosja e vijës venoze”, thuhet në njoftim. /teve1.info/
