Qeveria në detyrë e Republikës së Kosovës ka mbajtur dje një mbledhje elektronike, në të cilën ka miratuar kërkesën e Ministrisë së Mbrojtjes për dërgimin e Kontingjentit të Forcës së Sigurisë së Kosovës (FSK) në një operacion humanitar në Republikën e Shqipërisë.
Sipas njoftimit të fundit të Zyrës së Kryeministrit, kontingjenti i FSK-së do të marrë pjesë në operacionin për kërkimin e të riut 24-vjeçar, Jurgen Karaj, i cili konsiderohet i humbur në zonën e Klosit.
Edhe presidentja e Kosovës, Vjosa Osmani, ka autorizuar dërgimin e FSK-së në Shqipëri dhe ka theksuar gatishmërinë e forcës për të ndihmuar kurdo dhe kudo që ka nevojë.
“Forca e Sigurisë së Kosovës është e gatshme për ndihmë vëllazërore, kudo dhe kurdo që ka nevojë, duke kontribuar në operacione humanitare dhe kërkim-shpëtimi në rajon”, ka thënë Osmani.
Ky operacion vjen pas kërkesës së autoriteteve shqiptare dhe është pjesë e bashkëpunimit ndërkombëtar në rastet emergjente dhe humanitare.
