Kryetarja e Alternativës dhe deputetja e zgjedhur nga lista e Lëvizjes Vetëvendosje, Mimoza Kusari-Lila, ka reaguar lidhur me rastet e abuzimit gjatë procesit zgjedhor, duke e cilësuar situatën si një nga më të rënat në historinë e demokracisë në vend.
Sipas saj, edhe pse organet e rendit, përfshirë Prokurorinë në Prizren dhe atë në Gjakovë, kanë ndërmarrë veprime, është evidentuar se janë gjetur mënyra për të manipuluar vullnetin e qytetarëve.
Kusari – Lila kërkon dënimin më të ashpër për të gjithë të përfshirët dhe ata që kanë ndikuar në “vjedhjen masive” të procesit zgjedhor.
“Mendoj se ka qenë një prej situatave më të rënda në procesin esencial të çdo demokracie në shtet. Jemi paska të ngushëlluar në mënyrën se si kanë vepruar organet e rendit, në veçanti Prokuroria në Prizren dhe tashmë edhe ajo e Gjakovës. Është evidente se janë gjetur – përkundrejt të gjitha masave për t’u monitoruar dhe për të pasur një proces të qartë të mbikëqyrjes së procesit të votimit dhe numërimit. Janë gjetur format dhe mënyrat për t’u abuzuar vullneti i qytetarëve dhe kjo kërkon dënimin më të ashpër përfshirë të gjithë ata që kanë qenë të involvuar në proces dhe atë të cilët kanë adresuar ose orientuar këtë vjedhje masive”, deklaroi ajo në emisionin “Mesditë” në Tëvë1.
Ajo thekson se këto raste kanë dhënë një imazh të keq vendit dhe kanë dëmtuar besimin e qytetarëve dhe komunitetit ndërkombëtar, duke nënvizuar se kjo është një nga dëmet më të mëdha për kredibilitetin e një shteti të ri, që deri më tani ishte konsideruar model në organizimin e zgjedhjeve.
“Përveç organeve të rendit, tashmë edhe prezantimit të fakteve dhe evidencave të tjera është proces në rrugën e duhur. Fatkeqësisht i dha një hije të keqe vendit dhe një humbje besimi edhe për jashtë. Është turp i madh. Është turp për të gjithë ata që kanë qenë të përfshirë e natyrisht është njëra prej dëmeve më të mëdha që i bëhet kredibilitetit të një shtetit të ri, që deri vonë është marrë model për procesin zgjedhor dhe për fushatën e realizuar”, deklaroi ajo.
