Kryetarja e Komunës së Preshevës, Ardita Sinani, ka deklaruar se nga 22 pakicat që jetojnë në Serbi, pakica shqiptare është më e diskriminuara, madje edhe më shumë se pakica rome dhe çdo pakicë tjetër.
Sinani, ka theksuar se Presheva është e vetmja komunë jashtë ndikimit të Senatit në Serbi, ndërsa të gjitha komunat e tjera janë jo vetëm nën ndikim të drejtpërdrejtë të tij, por udhëhiqen nga ky institucion
Ajo ka shtuar se Serbia ka centralizuar sistemin e menaxhimit, qoftë në aspektin ekonomik, qoftë në transferimet e rregullta ose investimet publike.
“E vetmja komunë jashtë ndikimit të Senatit është Komuna e Preshevës. Të gjitha komunat e tjera jo vetëm që janë nën ndikimin e drejtpërdrejtë të Senatit, por udhëhiqen nga ai. Serbia ka centralizuar sistemin e menaxhimit, qoftë nga aspekti ekonomik, qoftë nga transferimet e rregullta ose investimet publike. Transferi i rregullt nuk është rritur për mbi 10 vite, ndërsa mjetet e trupit koordinues në dy vitet e fundit janë zvogëluar. Nga 22 pakicat që janë në Serbi, pakica shqiptare është më e diskriminuara, madje edhe më shumë se pakica rome dhe çdo pakicë tjetër. Projektet që na refuzohen nuk refuzohen kurrë për mosplotësim të dokumentacionit, por pa kurrfarë arsye, vetëm për arsye diskriminuese. Bizneset tona vendore, përveç remitencave nga diaspora, nuk subvencionohen asnjëherë nga qeveria”, ka thënë Sinani.
E pyetur mbi nivelin e investimeve totale në Preshevë gjatë viteve të fundit, Sinani ka deklaruar:
“Buxheti vjetor i Komunës së Preshevës është 7 milionë euro, i realizuar nga kryetari i mëparshëm, ndërsa këtë vit unë kam arritur ta rris në 9 milionë euro. Por investimet direkte nga qeveria e Serbisë janë vetëm 700 mijë euro vitin e fundit”. /teve1.info/
