Ardjan Ismajli rrezikon seriozisht të mungojë në ndeshjen gjysmëfinale të play-off-it të Botërorit ndaj Polonisë, një përballje vendimtare për kombëtaren kuqezi.
Mbrojtësi shqiptar u detyrua të lërë fushën që në pjesën e parë të sfidës mes Comos dhe Torinos, pasi ndjeu shqetësime të forta në kofshën e djathtë, duke ngritur menjëherë alarmin te stafi teknik dhe mjekësor.
Pas ekzaminimeve të kryera, klubi konfirmoi zyrtarisht se Ismajli ka pësuar një dëmtim muskulor në kofshën e djathtë.
Diagnoza e saktë është një tendosje e pjesshme shpërqendruese e muskujve fleksorë, një dëmtim që kërkon kujdes maksimal në procesin e rikuperimit për të shmangur përkeqësime të mëtejshme.
Në njoftimin e klubit theksohet se koha e rikuperimit do të varet nga ecuria klinike e lojtarit, pa dhënë një afat konkret për rikthimin në fushë.
Megjithatë, mediat italiane raportojnë se mungesa e Ismajlit mund të zgjasë minimalisht një muaj, çka e bën thuajse të pamundur rikthimin e tij në kohë dhe në formën optimale për ndeshjen ndaj Polonisë.
Një mungesë e tillë do të përbënte një goditje të ndjeshme për mbrojtjen e kombëtares, pasi Ismajli është një nga shtyllat kryesore të repartit defensiv
Stafi teknik i Shqipërisë do të ndjekë nga afër gjendjen e tij, duke shpresuar për një rikuperim më të shpejtë se parashikimet fillestare, edhe pse gjasat aktuale mbeten të pakta.
