Shemsi Jashari, analist politik dhe i ftuar në emisionin “Ditari” në Tëvë1, ka komentuar mbi manipulimin e votave që ka ndodhur pas zgjedhjeve të 28 dhjetorit, duke shpjeguar se situata ka marrë përmasa serioze dhe kërkon përgjegjësi të plotë nga të gjithë ata të përfshirë.
Jashari ka theksuar se deri më tani janë arrestuar rreth 23 komisionerë, ndërsa 109 komisione janë përfshirë në hetimet për manipulimin e procesit zgjedhor. Ndërkohë, një pjesë e madhe e këtyre manipulimeve janë regjistruar në komunën e Prizrenit.
Ai ka komentuar mbi procesin e numërimit të votave, duke theksuar se, për shkak të një lufte politike, komisionerët e partive nuk kanë të drejtë të numërojnë votat e kandidatëve të vetë. Kjo ka bërë që votat të kalojnë në duar të komisionerëve të partive të tjera, duke i dhënë mundësinë për të manipuluar votat.
“Cka e bënë këtë edhe më komplekse dhe më të organizuar këtë proces është fakti që komisionerët e partive nuk kanë të drejtë t’i numërojnë votat e veta, që nënkupton që këto vota janë marrë nga komisionerët e partive të tjera”, tha Jashari.
Një tjetër pikë e rëndësishme që Jashari ka ngritur është përjashtimi i kandidatëve të përfshirë në këtë manipulim, duke kërkuar që ata të mbajnë përgjegjësi për veprimet e tyre. Ai ka theksuar se pas kësaj situate, ata që kanë prekur votat duhet të humbasin mandatin dhe të përballen me pasojat ligjore.
“Fakti që dikush ka manipuluar një votë qytetari është një shkelje e rëndë, dhe ata që janë të përfshirë duhet të marrin përgjegjësi dhe të lirojnë mandatin e tyre. Prokurori nuk duhet të ketë mëshirë për asnjë nga kandidatët e përfshirë dhe ata duhet të përjashtohen nga partia”, ka shtuar ai.
Në përfundim, Jashari ka bërë thirrje për një hetim të thelluar dhe për një qëndrim të prerë nga institucionet përgjegjëse, në mënyrë që procesi zgjedhor të vazhdojë me integritet dhe transparencë.//teve1.info//
