Oda Ekonomike e Kosovës ka reaguar lidhur me protestat e kompanive transportuese në disa shtete të rajonit, duke paralajmëruar se këto zhvillime po shkaktojnë pasoja serioze për funksionimin e bizneseve kosovare dhe për rrjedhën e tregtisë ndërkombëtare.
Sipas OEK-së, protestat kanë ndikuar drejtpërdrejt në pamundësimin e eksportit dhe importit të mallrave drejt dhe nga vendet e Bashkimit Evropian, duke shkaktuar vonesa të mëdha në transport, rritje të kostove operative për kompanitë dhe rrezik real për ndërprerjen e zinxhirit të furnizimit.
Në njoftim theksohet se kryetari i Odës Ekonomike të Kosovës, Lulzim Rafuna, njëkohësisht Kryesues i Bordit të WB6 CIF, e ka adresuar vazhdimisht këtë çështje në komunikimet me institucionet e Bashkimit Evropian, duke kërkuar një zgjidhje të qëndrueshme dhe sistemike.
“Kërkesa jonë ka qenë e qartë: funksionim i lirë i tregtisë dhe ruajtje e zinxhirëve të furnizimit ndërmjet Bashkimit Evropian dhe vendeve të Ballkanit Perëndimor”, thuhet në njoftimin e OEK-së.
Oda Ekonomike e Kosovës i ka bërë thirrje Bashkimit Evropian për ndërhyrje urgjente institucionale, e cila do të mundësonte funksionimin normal të transportit ndërkombëtar rrugor deri në arritjen e një zgjidhjeje të përhershme.
Sipas OEK-së, një qasje e tillë është në interes të përbashkët të ekonomive të Bashkimit Evropian dhe të Ballkanit Perëndimor, duke përbërë një parakusht për stabilitet ekonomik, integrim tregtar dhe zhvillim të qëndrueshëm rajonal.
“Oda Ekonomike e Kosovës mbetet e angazhuar për mbrojtjen e interesave të komunitetit të biznesit dhe për kontribuimin aktiv në dialogun institucional me partnerët evropianë, në funksion të garantimit të një tregtie të lirë, të sigurt dhe funksionale”, thuhet më tej në reagim.
