Nënkryetari i Federatës së Tenisit të Kosovës, Shkëlzen Domi, është pritur në një takim pune nga Kryetari i Komunës së Pejës, Gazmend Muhaxheri, si dhe nga Drejtoresha e DKRS – Pejë, Xhenet Syka.
Gjatë këtij takimi, Kryetari Muhaxheri njoftoi për ndërtimin e fushës së pestë të tenisit në kompleksin sportiv “Arben Zeka” në Brestovik, duke plotësuar kërkesën e KT Peja dhe FTK-së për zhvillimin e infrastrukturës sportive.
Me këtë investim, plotësohet edhe kriteri shtesë i kërkuar nga ITF dhe Tennis Europe për organizimin e turneve ndërkombëtare.
Po ashtu, u bë e ditur se gjatë këtij viti do të realizohet edhe rishtresimi i fushave ekzistuese në Brestovik.
Në emër të FTK-së, Nënkryetari Domi falënderoi Kryetarin Muhaxheri dhe Drejtoreshen Syka duke vlerësuar Komunën e Pejës për bashkëpunimin dhe mbështetjen institucionale në zhvillimin e infrastrukturës së tenisit.
FTK dhe KT Peja janë të gatshme të presin edicionin e tetë me radhë të turneve ndërkombëtare “Peja Open”.
