Kryetari i Kuvendit të Kosovës, Dimal Basha, ka kujtuar 22 janarin e vitit 1998, ditën kur njësite të policisë së Serbisë kryen aksionin e dytë kriminal ndaj familjes së Shaban Jasharit në Prekaz të Poshtëm të Drenicës.
I pari i Kuvendit ka theksuar se qëndresa e familjes Jashari gjatë janarit të atij viti u shndërrua në simbol të vendosmërisë për liri dhe frymëzoi mijëra shqiptarë që t’i bashkoheshin Ushtrisë Çlirimtare të Kosovës në luftën për çlirimin e vendit.
Postimi i plotë:
Më 22 janar 1998, në orët e hershme të mëngjesit, forcat speciale të policisë së Serbisë kryen sulmin e dytë kriminal ndaj familjes Jashari në Prekaz.
Pasi ndërprenë energjinë elektrike dhe linjat telefonike në mesnatë, njësitë policore nisën një aksion të befasishëm me predha dhe breshëri armësh automatike, me synim arrestimin ose eliminimin e Hamzës, Ademit e familjes Jasharit.
Shaban Jashari, së bashku me djalin e tij Hamzën dhe anëtarë të tjerë të familjes, rezistuan me armë duke mbrojtur pragun e shtëpisë.
Si pasojë e këtij sulmi u plagosën Selvete dhe Iliriana Jashari, ndërsa gjatë tërheqjes policia serbe vrau edhe një qytetar të pafajshëm, Hysen Manxhollin nga Mikushnica.
Ky ishte sulmi i dytë ndaj familjes Jashari, pas aksionit të vitit 1991, dhe paralajmërimi i rrethimit që do të ndodhte në mars të vitit 1998.
Qëndresa e Jasharëve në janar u shndërrua në simbol të vendosmërisë për liri dhe frymëzoi mijëra shqiptarë që t’i bashkoheshin Ushtrisë Çlirimtare të Kosovës në luftën e saj për çlirimin e vendit.
Sot, në këtë 28-vjetor, kjo ditë kujtohet me respekt dhe nderim të thellë për familjen e Shaban Jasharit, qëndresa dhe sakrifica e së cilës mbeten gurthemel i historisë sonë të lirisë.
Lavdi familjes Jasharari, lavdi luftës, sakrificës dhe qëndresës së tyre ndaj regjimist fashist!
