Policia e Kosovës ka bërë të ditur se ka ekstraduar një shtetas gjerman në Gjermani dhe ka transferuar një të dënuar nga Hungaria për në Kosovë, në kuadër të bashkëpunimit ndërkombëtar policor.
Shtetasi gjerman kërkohej për veprën penale të “Kontrabandimit me migrantë”. Në njoftim theksohet se:
“Më 22 janar 2026, është ekstraduar nga Kosova për në Gjermani shtetasi gjerman, i cili kërkohej me urdhër-arrest ndërkombëtar nga institucionet gjermane, pasi ishte shmangur nga drejtësia. Ekstradimi u realizua falë bashkëpunimit mes institucioneve të Republikës së Kosovës dhe Gjermanisë.”
Ndërkohë, kosovari që ishte i dënuar për “Grabitje dhe privim të kundërligjshëm të lirisë”, u transferua nga Hungaria në Kosovë. Pas transferimit, ai iu dorëzua Shërbimit Korrektues të Kosovës për të vuajtur pjesën e mbetur të dënimit, pasi një pjesë e tij ishte kryer në Hungari.
“Ekstradimi dhe transferimi u realizuan nën masa të rrepta sigurie,” theksohet në njoftim.
Policia e Kosovës, përmes Drejtorisë për Bashkëpunim Ndërkombëtar Policor, ka deklaruar se do të vazhdojë shkëmbimin e informacionit me institucionet vendore dhe ato ndërkombëtare për të parandaluar, hetuar dhe zbuluar aktivitetet kriminale, si dhe për të ndjekur dhe arrestuar persona dhe grupe kriminale që veprojnë brenda dhe jashtë vendit.
