Kryeministrja e Danimarkës, Mette Frederikson këmbënguli se vendi i saj nuk mund të negociojë për sovranitetin e saj të enjten.
Deklarata vjen pasi Presidenti i SHBA-së, Donald Trump, tha se kishte rënë dakord për një “kornizë të një marrëveshjeje të ardhshme” mbi sigurinë e Arktikut me kreun e NATO-s, por ajo tha se është “informuar se kjo nuk ka ndodhur”, raporton AP.
Të mërkurën, Trump hoqi papritur tarifat që kishte kërcënuar t’u vendoste tetë vendeve evropiane për të nxitur kontrollin e SHBA-së mbi Groenlandën , një territor gjysmëautonom i Danimarkës, aleatit të NATO-s.
Kjo ishte një kthesë dramatike disa orë pasi ai këmbënguli se donte të merrte ishullin “duke përfshirë të drejtën, titullin dhe pronësinë” – megjithëse tha gjithashtu se nuk do të përdorte forcën.
Ai tha se po zhvilloheshin “diskutime shtesë” mbi Grenlandën në lidhje me programin e mbrojtjes nga raketat Golden Dome , një sistem shumështresor prej 175 miliardë dollarësh që për herë të parë do të dërgojë armë amerikane në hapësirë.
Trump ofroi pak detaje, duke thënë se ato ishin ende duke u përpunuar.
Frederiksen shkroi se NATO është plotësisht në dijeni të qëndrimit të mbretërisë së Danimarkës se çdo gjë politike mund të negociohet, duke përfshirë sigurinë, investimet dhe çështjet ekonomike – “por ne nuk mund të negociojmë për sovranitetin tonë”.
Ajo tha se Danimarka dëshiron të vazhdojë të angazhohet në dialog konstruktiv me aleatët se si të forcojë sigurinë në Arktik, përfshirë programin amerikan Golden Dome, “me kusht që kjo të bëhet me respekt për integritetin tonë territorial”.
