Kryetari i Prishtinës, Përparim Rama, ka pritur të enjten në takim ambasadorin e Francës në Kosovë, Olivier Guérot, me të cilin ka diskutuar për forcimin e mëtejmë të bashkëpunimit ndërmjet dy palëve.
Sipas Ramës, në fokus të takimit kanë qenë fusha me interes të përbashkët, përfshirë arsimin, kulturën dhe zhvillimin urban.
Ai ka vlerësuar lart partneritetin me Francën, duke e cilësuar atë si të rëndësishëm për kryeqytetin dhe për Kosovën në përgjithësi.
Rama ka theksuar se partneritetet e qëndrueshme ndërtojnë ura bashkëpunimi dhe krijojnë mundësi të reja për qytetarët e Prishtinës.
“Bashkëpunimi me Francën mbetet një partneritet i rëndësishëm për Kryeqytetin dhe Kosovën. Sot, mirëprita Ambasadorin e Francës në Kosovë, z. Oliver Guérot, me të cilin diskutuam për forcimin e mëtejmë të bashkëpunimit në fusha me interes të përbashkët, përfshirë arsimin, kulturën dhe zhvillimin e qytetit. Partneritetet e qëndrueshme ndërtojnë ura bashkëpunimi dhe hapin mundësi të reja për qytetarët e Kryeqytetit”, ka shkruar Rama në Facebook.
