Presidenti amerikan, Donald Trump gjatë fjalimit të tij në Forumin Ekonomik Botëror riktheu vëmendjen edhe një herë në çështjen e Grenlandës, duke deklaruar se presidentët e Shteteve të Bashkuara kanë shprehur interes për blerjen e Grenlandës për gati dy shekuj.
Ai theksoi se, megjithëse SHBA-të kanë fuqinë për të vepruar, ai nuk ka ndërmend të përdorë forcën për të marrë kontrollin e ishullit.
“Nuk do të arrijmë asgjë nëse nuk përdor forcë dhe dhunë të tepruar, kur do të ishim të pandalshëm,” tha Trump, përpara se të shtonte qartë: “Nuk do të përdor forcë.”
Për këtë arsye ai thotë se po kërkon negociata të menjëhershme për të blerë ishullin arktik.
“Janë vetëm SHBA-të që mund ta mbrojnë këtë masë gjigante toke, këtë copë gjigante akulli, ta zhvillojnë dhe ta përmirësojnë atë,” deklaroi ai, duke shtuar se kjo është arsyeja pse po kërkon “negociata të menjëhershme” për blerjen e Grenlandës. “Po kërkoj negociata të menjëhershme për të blerë Grenlandën,” tha Trump.
“Mund të thuash po dhe ne do të jemi shumë mirënjohës, ose mund të thuash jo dhe ne do ta kujtojmë.”
Trump pohoi se Danimarka ka një prani minimale në Grenlandë dhe se nuk ka përmbushur angazhimet financiare ndaj ishullit. Sipas tij, nuk ka “asnjë shenjë” reale të Danimarkës në territor dhe mbrojtja e Grenlandës është e pamjaftueshme.
Duke vijuar komentet e tij, Trump e përshkroi Grenlandën si një “vend të gjerë, pothuajse të pabanuar dhe të pazhvilluar, që rri i pambrojtur”.
Ai hodhi poshtë idenë se interesi amerikan lidhet me burimet natyrore, duke deklaruar se “nuk ka diçka të tillë si materiale të rralla tokësore në Grenlandë”. Sipas tij, ajo që ka rëndësi është “siguria e saj strategjike kombëtare dhe siguria ndërkombëtare”.
Presidenti amerikan shfrytëzoi gjithashtu fjalën e tij për të kritikuar NATO-n dhe marrëdhëniet me Evropën.
Duke folur për aleancën ushtarake, Trump tha se “ne japim kaq shumë dhe marrim kaq pak në këmbim”.
Sipas tij, Shtetet e Bashkuara përfitojnë vetëm “vdekje, përçarje dhe shuma të mëdha parash [të dhëna] për njerëzit që nuk e vlerësojnë atë që bëjmë”, deklaratë që ai e zgjeroi si për NATO-n ashtu edhe për Evropën në përgjithësi.
