Vendimi i Komisionit Qendror të Zgjedhjeve (KQZ) për rinumërimin e votave të zgjedhjeve nacionale të 28 dhjetorit në 28 komuna, ka nxitur reagimin e kryetarit të Drenasit, Ramiz Lladrovci.
Përmes një postimi në rrjetet sociale, Lladrovci ka deklaruar se ky vendim ka qenë i pritur, duke theksuar se procesi zgjedhor ka qenë i paqartë dhe jo plotësisht transparent.
“Më në fund i doli tymi! E ditur dhe e pritur… çështje ishte vetëm koha kur do ta shohin të gjithë se ka mjegull në proces dhe jo gjithçka është transparente dhe zbatim i ligjit”, ka shkruar ai.
Lladrovci ka theksuar se mënyra e zhvillimit të procesit zgjedhor ka dëmtuar reputacionin e disa kandidatëve, jo për shkak të mungesës së votave, por për shkak të parregullsive të brendshme.
“Ka personalitete që kanë marrë pjesë një herë në zgjedhje dhe më kurrë nuk do të marrin pjesë, për shkak të dëmtimit të reputacionit nga vjedhjet e brendshme”, ka shtuar ai.
Sipas tij, procesi zgjedhor ka treguar se demokracia në vend është e brishtë dhe e cenuar pikërisht në momentin më të ndjeshëm.
“Vjedhja e votës dëmton secilin qytetar dhe besueshmërinë ndaj shtetit”, ka deklaruar Lladrovci.
Ai ka përsëritur qëndrimin e tij kundër listave me dhjetë kandidatë, duke argumentuar se kjo rrit mundësinë e manipulimit të votës dhe ka kërkuar ndryshime ligjore.
“Pres hapa urgjent për digjitalizimin e votimit dhe ndryshimin e ligjit: një votë – një kandidat”, ka përfunduar ai.
