Deputeti i zgjedhur i Partisë Demokratike të Kosovës (PDK), Xhavit Haliti, ka deklaruar se projekti i partisë për t’i fituar zgjedhjet nuk ka dhënë rezultat, duke theksuar se përfundimi ishte i pritshëm edhe sipas sondazheve paraprake.
Haliti tha se PDK kishte shpresuar në një rritje të votës, përfshirë edhe mbështetjen nga diaspora, por kjo nuk ndodhi.
Sipas tij, rezultati përfundimtar nuk përputhet me pritjet fillestare dhe partia duhet ta pranojë realitetin zgjedhor.
“Projekti për t’i fituar zgjedhjet nuk ka funksionuar. Ne realisht e kemi ditur përafërsisht rezultatin në bazë të sondazheve duke pasur një vendim që mund të rritet dhe që diaspora mund ta votojë PDK-në. Ajo nuk ndodhi dhe s’doli rezultati në përputhje me votat që janë dhënë, prandaj duhet të pajtohemi me këtë rezultat, ky që është. Kam menduar se mund të rritemi, por sondazhet e besueshme e kanë publikuar këtë rezultat që e kemi”, deklaroi ai në emisionin “Info Nata” në Tëvë1.
Ai theksoi se kandidati për kryeministër, Bedri Hamza, nuk mban përgjegjësi individuale për humbjen e zgjedhjeve, por se përgjegjësia është kolektive brenda partisë.
Sipas tij, kryesia e PDK-së ka dështuar të krijojë frymën e fitores brenda partisë, si dhe të zhvillojë një betejë të fuqishme politike në terren.
“Bedri Hamza nuk ka përgjegjësi për humbjen e zgjedhjeve, përgjegjës jemi të gjithë. Por, mbi të gjitha përgjegjës janë strukturat drejtuese të partisë, kryesia që nuk ka arrit me krijua frymën e fitores brenda PDK-së e para, e dyta që nuk është bërë betejë politike duke përfshirë edhe protestat në rrugë dhe kontaktet fizike përmes elementeve të përgatitur të partisë me elektoratin, dhe e treta më e rëndësishme strukturimi i partisë, kemi gjatë që s’kemi mbaj Kuvend, zgjedhje të degëve të reja dhe një e kanë konsideruar të lënë pas dore”, theksoi Haliti.
