Dy persona janë arrestuar në fshatin Smirë të komunës së Vitisë, nën dyshimin se janë përfshirë në tri raste të vjedhjeve të rënda që kanë ndodhur në shkolla.
Pas hetimeve intensive në terren, Policia e Kosovës ka identifikuar të dyshuarit dhe me urdhër të gjykatës ka realizuar kontrolle në dy lokacione të ndara. Gjatë kontrollit në shtëpinë e njërit prej të arrestuarve janë gjetur dhe konfiskuar disa sende që dyshohet se janë vjedhur nga shkollat.
Me vendim të prokurorit kompetent, të dyshuarit janë dërguar në mbajtje, ndërsa hetimet lidhur me këto raste janë duke vazhduar.
