Gjatë vizitës së tij zyrtare në shtetin amerikan të Ajovës, komandanti i Forcës së Sigurisë së Kosovës (FSK), gjeneral Bashkim Jashari, ka vizituar bazën e aviacionit të Gardës Kombëtare të Ajovës, e cila konsiderohet një nga njësitë më të rëndësishme të saj.
Sipas njoftimit të FSK-së, gjeneral Jashari u njoh nga afër me kapacitetet dhe aftësitë operacionale të kësaj baze, përfshirë flotën e helikopterëve Black Hawk që janë në përdorim nga Garda Kombëtare e Ajovës.
Gjatë vizitës, delegacioni i FSK-së është informuar për procedurat e trajnimit të personelit të aviacionit, mirëmbajtjen dhe inspektimin e helikopterëve, si dhe për infrastrukturën mbështetëse që shërben për operimin e tyre.
Në kuadër të takimit me gjeneralin Osborn, palët janë dakorduar për formimin e grupeve të përbashkëta punuese, me qëllim planifikimin e zhvillimit të kapaciteteve të aviacionit brenda FSK-së, duke përfshirë trajnimet, operimin, mirëmbajtjen dhe ndërtimin e infrastrukturës së nevojshme.
Në përmbyllje të vizitës, gjeneral Jashari ka vlerësuar profesionalizmin e lartë të kësaj njësie dhe ka falënderuar stafin e bazës për gatishmërinë e treguar në ofrimin e mbështetjes për FSK-në, duke theksuar se helikopterët Black Hawk paraqesin një kapacitet kyç për zhvillimin e ardhshëm të forcës.
