Bujar Loci më nuk është trajner i Rahovecit 029, skuadër që bën gara në Superligën e Kosovës në basketboll.
Klubi që po debuton këtë sezon në Superligë, të enjten ka njoftuar për ndërprerjen e bashkëpunimit me marrëveshje të dyanshme me Locin, i cili është edhe selektor i Kombëtares së Kosovës.
Rahoveci 029 ka falënderuar Locin për angazhimin, korrektësinë dhe gjithçka që ka dhënë për një sezon e gjysmë sa ishte në krye të ekipit, të cilin e inkuadroi në elitën e basketbollit kosovar.
“Për një sezon e gjysmë, trajneri Loci ishte pjesë e rëndësishme e historisë së inkuadrimit dhe zhvillimit të klubit tonë, duke dhënë kontribut të çmuar me përkushtim, profesionalizëm dhe punë të palodhshme”, ka shkruar Rahoveci 029.
Largimi i Locit nga Rahoveci 029 vjen një ditë pas humbjes nga Bora, disfatë kjo që ishte e katërta rresht në Superligë.
Aktualisht, Rahoveci 029 zë vendin e fundit në tabelë me 20 pikë, ku në 15 ndeshje të luajtura deri më tani këtë sezon, ka regjistruar 5 fitore karshi 10 humbjeve.
