Fotografi i njohur Arian Mavriqi ka njoftuar se së shpejti do të nisë dokumentarin e tij, i cili do të transmetohet çdo të diel në televizionin Tëvë1, nga ora 18:30.
Mavriqi ka bërë të ditur se ka arritur një marrëveshje bashkëpunimi me Tëvë1, ndërsa dokumentari i titulluar “Wildlife me Arian Mavriqin” do të sjellë çdo javë nga një episod të ri, me filmime të reja nga natyra dhe fauna e egër.
“Të dashur! Me kënaqësinë më të madhe dua të njoftoj se kam arritur marrëveshje bashkëpunimi me Tëvë1 dhe dokumentari im ‘Wildlife me Arian Mavriqin’ tash e tutje do të transmetohet çdo të diel, nga ora 18:30, në Tëvë1. Çdo javë një episod i ri, çdo javë filmime të reja. Na priftë e mbara dhe Zoti na ndihmoftë në këtë rrugëtim të ri”, ka shkruar Mavriqi në rrjetin social Facebook.
Dokumentari pritet të ofrojë pamje unike dhe përmbajtje edukative për botën e egër.
