Pas protestave për përfshirje në pagën minimale, java e ardhshme do të jetë me propozime të reja për përfaqësuesit e organizatave të luftës nga ekzekutivi.
Kurti ka thënë se beson që fjala pagë dhe veteran nuk duhet të jenë në një fjali, ngase veteranët duhet të marrin beneficion si mirënjohje për kontributin e tyre në luftë.
“Jam i hapur dialog, për komunikim, për kontakte të rregullta, zyrën time e kanë të hapur për të gjitha takimet dhe dilemat që mund t’i kenë, por në të njëjtën kohë e shpreh edhe përkushtimin tim, jo vetëm me këtë çështje, se Qeveria e Kosovës është e interesuar që UÇK të trajtohet me dinjitet edhe sa i përket zhvillimit socio-ekonomik të vendit tonë, por edhe sa i përket aspektit institucional e demokratik të shtetit të pavarur të Kosovës. Pra, nuk duam rritje ekonomike e mirëqenie pa veteranët, dhe nuk duam demokraci e pavarësi pa veteranët, e duam me ta”, ka thënë Kurti.
Përveç kësaj, kryeministri Kurti foli edhe për liberalizimin e vizave, mirëpo refuzoi të flasë për data konkrete në lidhje me këtë çështje.
“Ajo çfarë duhet ta theksojmë përditë është që moti i kemi plotësuar 95 kriteret që janë më shumë se dyfishi i numrit të kritereve për vendet e tjera të rajonit dhe që në muajin e ardhshëm shënojmë katër vjetorin e Komisionit Evropian që për herë të dytë, para 4 viteve, tha se Kosovës duhet t’i liberalizohen vizat”, ka thënë ai.
Gjatë kësaj konference, Kurti ka sqaruar se për çfarë është biseduar mes palës serbe dhe kompanisë turke KEDS në lidhje me marrëveshjen për energjinë.
“Vendosja e matësve të energjisë, mirëmbajtja e matëse, faturimi dhe inkasimi dhe këtë obligim ne e kemi përmbushur e që i referohet takimeve ndërmjet KEDS-it dhe palës serbe. Pra, vetëm në këtë aspekt ata kanë biseduar. Nuk do të ketë asnjë shërbim shtesë në fushën e distribucionit përtej këtyre katër shërbimeve që i përmenda dhe përtej katër komunave në veri të Republikës së Kosovës. Pra, në këtë aspekt kanë biseduar KEDS-i me palën serbe”, ka shtuar Kurti.
Gjatë javëve të fundit, është kërkuar heqja e akcizës dhe TVSH-së për naftën, mirëpo i pari i qeverisë tha se largimi i tyre nuk është një politikë e dobishme dhe rrezikon të shndërrohet në një super-profit për kompanitë.
Kronika e realizuar nga gazetarja Fetije Kamberi.
