Kulla e familjes e cila i dha të gjitha për lirinë e vendit, ishte në këtë gjendje edhe në 23-vjetorin e çlirimit të Skenderajt.
Për ta vizituar Kullën e Jasharajve në Prekaz të shtunën erdhi Ramadan Hoti, ish-luftëtar i Ushtrisë Çlirimtare të Kosovës.
Ai rrëfen se si e gjeti Prekazin në ditën kur okupatori serb u largua nga kjo pjesë.
“Ditën e Çlirimit pasi hymë në Skenderaj kemi ardhë disa shokë knena për Prekaz kështu që ka qenë krejt e shkatërrume totalisht. Tash prej atij shkatërrimi shifen vetëm kullat këtu që janë të shkatërrume sepse këto janë renovu e rregullum ama total çdo sen këtu ka qenë e shkatërrime”, thotë Hoti.
Hoti ka një dëshirë për kullat që po rrezikojnë të shemben.
“Këto u kanë mirë nga qeveria a nga ndonjë donator me u ba sepse janë t’u u shemb, asht historia t’u ra t’u u prish”, shtoi ai.
Ditën kur u çlirua Skenderaj e kujton mjaft mirë edhe Abdullah Gashi, ish-komandant togu në zonën e Kryshecit e Polacit. Ai tregon se teksa ishin të udhëzuar të vëzhgonin forcat serbe kur po largoheshin, kishin vërejtur se ata po bënin veprime kriminale.
“Duke u larguar forcat serbe gjatë vëzhgimeve tona që i kemi ba kur kanë qenë nëpër pozicione të tyne forcat serbe kanë demolu, kanë vjedh e gjana të tjera të pahijshme që nuk i takon asnjë populli”, tha Gashi.
Pasi që kishin hyrë në Shtëpinë e Kulturës në qytet, Gashi me bashkëluftëtarë kishin gjetur një serb por kishin vendosur të mos e vrisnin.
“Popullata, kur e kemi zdjerg prej atyhit popullata thjesht ka desht me hangër siç thojnë populli por ne nuk e kemi lanë kurrqysh me iu avit por na e kemi marrë dhe ia kemi dorëzu KFOR-it francez. Na nuk jemi kriminel, nuk kemi bo krime”, shtoi ai.
Dita e Çlirimit të shtunën u shënua edhe në një qytet jo larg Skenderajt, atje të Klinës.
Komandanti Ibish Rraci tregon se si një ditë para çlirimit kishin hasur në rezistencën e serbëve, të cilët e qëlluan edhe me bomba nga një shtëpi ku ishin fshehur.
“Kur kam shku te dera, dera ka qenë e mbyllur. Me qytë të pushkës automatike i kam thye xhamat. Ata janë friku që do të muj me hy aty. Por pareshtur nga ballkoni më janë gju bomba, bomba të dorës. Unë nuk i maj ato reliktet por i kam pas deri vonë edhe maicat edhe patikat e mbuluara me gjak”, tha Rraci.
Rraci shton se pas kësaj ndodhie kishin intervenuar trupat e NATO-s të cilat i kishin larguar nga aty trupat serbe.
Për nder të Ditës së Çlirimit, si Skenderaj ashtu edhe Klina kanë shënuar aktivitete të ndryshme.
Kronika e realizuar nga gazetari Gojart Jashari.
