Ambasadori i Bashkimit Evropian në Kosovë Aivo Orav, është takuar me ministrin në detyrë të Administrimit të Pushtetit Lokal, Elbert Krasniqi.
Sipas njoftimit të Zyrës së BE-së Orav diskutoi rolin e qeverisjes vendore të fortë dhe të përgjegjshme në zbatimin e reformave me Krasniqin.
“Zgjedhjet e fundit në Kosovë tregojnë se si demokracia vendore angazhon njerëzit dhe formëson politikat që pasqyrojnë nevojat e komunitetit përmes vendimmarrjes pranë tyre”, tha Orav.
Për takimin ka shkruar edhe ministri në detyrë i Administrimit dhe Pushtetit Lokal, Elbert Krasniqi.
“Me ambasadorin e Bashkimit Europian, Aivo Orav, diskutuam për zhvillimet politike në vend duke u fokusuar gjithashtu në projektet e ministrisë si dhe procesin e inagurimit të kuvendeve komunale të sapoformuara pas zgjedhjeve lokale, për të cilat MAPL po vazhdon të ofroj ndihmën e nevojshme për organet komunale bazuar në Ligjin për Vetëqeverisje Lokale”, ka shkruar ai.
