Komuna e Skenderajt ka njoftuar qytetarët se nga data 9 janar fillon procesi i aplikimit për vlerësimin e dëmeve të shkaktuara në ekonomitë familjare dhe biznese, si pasojë e vërshimeve të fundit.
Sipas njoftimit zyrtar, të gjithë qytetarët e prekur nga vërshimet ftohen që brenda afatit të përcaktuar të paraqesin kërkesën e tyre pranë Komisionit Komunal për Vlerësimin e Dëmeve.
Për aplikim, qytetarët duhet të dorëzojnë dokumentacionin e nevojshëm që përfshin: të dhënat personale të aplikuesit, kopje të letërnjoftimit, konfirmim bankar me llogari në emër të aplikuesit, fotografi që dëshmojnë gjendjen reale të dëmeve nga vendi i prekur, si dhe çdo dokument shtesë që vërteton pronësinë apo dëmin e pësuar, nëse ka.
Komuna ka bërë të ditur se afati për dorëzimin e kërkesave është tetë (8) ditë pune, duke filluar nga data e publikimit të njoftimit.
Kërkesat duhet të dorëzohen personalish pranë Komisionit Komunal për Vlerësimin e Dëmeve, në sportelin numër 13, në objektin e Komunës së Skenderajt.
Autoritetet komunale u bëjnë thirrje qytetarëve që të respektojnë afatin dhe të kompletojnë dokumentacionin përkatës për të mundësuar vlerësimin sa më të saktë të dëmeve.
