Sigal Prishtina ka vazhduar të forcohet me basketbollistë të huaj, ku një ditë pasi prezantoi amerikanin Kahlil Dukes, të enjten ka zyrtarizuar edhe suedezin Elijah Clarance.
Clarance do të jetë pjesë e Prishtinës deri në fund të këtij sezoni, ndërsa ka gjasa që për ekipin nga kryeqyteti të debutojë në Kupë kundër Vëllaznimit apo Trepçës.
27-vjeçari luan në pozitën e fundorit dhe është i gjatë 193 centimetra kurse sukseset nuk i kanë munguar në skuadrat ku ka bërë karrierë.
Së fundmi, Clarance ka luajtur në Meksikë te Dorados dhe kishte një mesatare prej 17 pikëve, 3 kërcimeve e 2 asistimeve për ndeshje.
Ndërkohë, në Evropë, Clarance ka bërë karrierë në Gjermani, Holandë, Kroaci, Mal të Zi, Letoni, Hungari dhe Estoni.
Në Estoni e ka fituar Kupën me ekipin Kalev/Cramo, ndërsa në Letoni me Rigan krahas Kupës e ka fituar edhe titullin e kampionit.
Clarance ka qenë MVP në Mal të Zi dhe koshashënuesi më i mirë në sezonin 2021/22, përgjatë të cilit ka qenë pjesë e skuadrës së Lovqenit.
