Kryetari i Komunës së Obiliqit, Halil Thaçi, ka deklaruar se situata e krijuar nga vërshimet në këtë komunë është nën kontroll, ndërsa ekipet emergjente janë të angazhuara pa ndërprerë në terren.
Në një lidhje direkte në emisionin “Info Nata” në Tëvë1, Thaçi tha se gjatë 24 orëve të fundit kanë qenë aktive ekipet komunale, si dhe Shoqata e Kërkim-Shpëtimit, e cila ka ndihmuar në disa raste emergjente.
“Ekipet tona janë në terren 24 orë. Në Obiliq ndodhet edhe baza e Shoqatës së Kërkim-Shpëtimit, të cilët kanë ndihmuar shumë dhe i falënderojmë për angazhimin. Pak më herët ka ndodhur një intervenim, ku njëri nga anëtarët e tyre ka nxjerrë një shofer nga një veturë e mbetur nga uji. Tani ka filluar të bjerë borë dhe shpresojmë që të ketë stabilizim të nivelit të ujit”, ka thënë Thaçi.
Ai ka shtuar se vërshimet kanë prekur disa zona, por situata po menaxhohet.
“Ka pasur vërshime dhe ende ka në disa pjesë, por gjendja është nën kontroll. Ka disa familje që uji u ka hyrë në katin e parë dhe shumë prej tyre po qëndrojnë në katin e dytë. Ajo që dua të theksoj është se qytetarët duhet të kenë kujdes të shtuar”, ka deklaruar Thaçi.
Kryetari i Obiliqit ka bërë apel për vigjilencë dhe bashkëpunim të qytetarëve, derisa ekipet komunale vazhdojnë të jenë në gatishmëri për çdo rast emergjent.
