Komandanti i misionit të KFOR-it, gjeneralmajor Özkan Ulutaş, priti sot në vizitë presidenten e Kosovës, Vjosa Osmani, në Camp Film City, në Prishtinë.
Sipas njoftimit zyrtar të KFOR-it, gjatë takimit gjeneralmajor Ulutaş theksoi angazhimin e palëkundur të misionit të udhëhequr nga NATO për të vazhduar kontributin në sigurinë në të gjithë Kosovën dhe në ruajtjen e stabilitetit rajonal.
Ai po ashtu nënvizoi gatishmërinë e KFOR-it për të rritur koordinimin dhe bashkëpunimin efektiv me institucionet e Kosovës, në veçanti me Policinë e Kosovës.
“Komandanti i misionit të KFOR-it, gjeneralmajor Özkan Ulutaş, theksoi angazhimin e palëkundur të KFOR-it për të vazhduar kontributin në sigurinë në të gjithë Kosovën dhe në stabilitetin rajonal, si dhe gatishmërinë për të forcuar koordinimin dhe bashkëpunimin efektiv me institucionet e Kosovës, në veçanti me Policinë e Kosovës”, thuhet në njoftimin e KFOR-it.
Në njoftim bëhet e ditur gjithashtu se KFOR-i vazhdon zbatimin e mandatit të tij, të bazuar në Rezolutën 1244 të Këshillit të Sigurimit të OKB-së (1999), për të kontribuar në një mjedis të sigurt dhe të qetë për të gjithë qytetarët e Kosovës dhe për të garantuar lirinë e lëvizjes, në çdo kohë dhe në mënyrë të paanshme.
KFOR-i thekson se vepron në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në përputhje me rolet e tyre si reagues të sigurisë.
