Policia e Kosovës ka arrestuar në orët e para të së premtes një shtetas turk, i cili ishte në kërkim nga autoritetet e Maqedonisë së Veriut për dyshimin e kryerjes së një vrasjeje një ditë më parë në Shkup.
Identifikimi dhe arrestimi i tij u realizua nga Drejtoria për Bashkëpunim Ndërkombëtar Policor, në koordinim me njësitet e Policisë Kufitare.
“Drejtoria për Bashkëpunim Ndërkombëtar Policor, përkatësisht njësiti i saj FAST, kanë identifikuar dhe arrestuar një të dyshuar i kërkuar nga autoritetet e Maqedonisë së Veriut.
Sot me datë 02.01.2026 rreth orës 00:30, zyrtarët policorë nga Drejtoria për Bashkëpunim Ndërkombëtar Policor, në bashkëpunim dhe koordinim me njësitet e Policisë Kufitare, kanë bërë identifikimin dhe arrestimin e personit të dyshuar, shtetas turk, i kërkuar nga autoritetet e Maqedonisë së Veriut për veprën penale ‘Vrasje’ e ndodhur një ditë me herët në qytetin e Shkupit”, thuhet në njoftim.
I dyshuari është dërguar në ndalim policor për 48 orë, para se të vazhdojnë procedurat e mëtejshme ligjore.
Ndryshe, një 22-vjeçar, shtetas turk, u vra me thikë gjatë natës së Vitit të Ri në Çarshinë e Vjetër të Shkupit, në Maqedoninë e Veriut. Në të njëjtën ngjarje, një person tjetër u plagos rëndë. /teve1.info/
