Kryetari i BDI-së, Ali Ahmeti, ka shprehur ngushëllime me rastin e ndarjes nga jeta të ish-kryeparlamentarit të Kosovës, Nexhat Daci.
Ai theksoi se Kosova ka humbur jo vetëm një figurë politike, por edhe një nga akademikët dhe personalitetet më të shquara të saj.
“Me dhimbje të thellë e pranova lajmin për ndarjen nga jeta të mikut tim, akademik Nexhat Dacit. Kosova sot nuk ka humbur vetëm një ish-politikan, por një nga akademikët më të shquar dhe personalitetet më të rëndësishme të saj”.
Ahmeti vlerësoi rolin e Dacit në proceset kyçe shtetformuese, duke theksuar kontributin e tij me urtësi dhe pjekuri politike në rrugën drejt pavarësisë së Kosovës.
“Akademik Daci, me urtësinë dhe pjekurinë e tij politike, ka luajtur një rol kyç në proceset më të rëndësishme që çuan drejt pavarësimit të shtetit të Kosovës. Ngushëllimet e mia më të sinqerta familjes së tij, miqve dhe të gjithë atyre që e njohën dhe e çmuan veprën e tij. U prehtë në paqe”, ka shkruar Ahmeti./teve1.info/
