Publicisti, Fatos Lubonja ka komentuar rezultatin e zgjedhjeve të 28 dhjetorit në Kosovë, duke theksuar se fitorja e Albin Kurtit mbart njëkohësisht anë pozitive dhe negative.
Në një intervistë në emisionin“Mesditë” në Tëvë1, Lubonja u shpreh se e vlerëson pozitivisht gatishmërinë e Kurtit për t’u përballur me një sistem qeverisjeje të ndërtuar mbi oligarkinë, model që sipas tij është konsoliduar në Shqipëri.
Sipas Lubonjës, kjo qasje përfaqëson një shpresë për katër vitet e ardhshme, sidomos në aspektin e luftës kundër një sistemi të kapur nga interesa të ngushta.
Megjithatë, ai ngriti shqetësime për rritjen e rrezikut të autoritarizmit, duke vënë në dukje mënyrën se si funksionon partia e Kurtit dhe faktin se gjithçka, sipas tij, duket e ndërtuar mbi kultin e liderit.
Lubonja e cilësoi qëndrimin e Kurtit si problematik në disa aspekte, duke thënë se ai mund të kënaqë krenarinë kombëtare dhe nevojën e Kosovës për konsolidim, por se realiteti aktual kërkon më shumë fleksibilitet dhe bashkëpunim, veçanërisht me opozitën.
Në përfundim, Lubonja theksoi se fitorja mund ta mbushë me krenari fituesin, por njëkohësisht mbart dobësi që mund të shfaqen gjatë qeverisjes.
“Mendoj se ky rezultat i zgjedhjeve ka anët e veta pozitive dhe negative, anët e veta të mira i shikoj në disa anë që deri tani ja kam çmuar pozitivisht Albin Kurtit, gatishmëria e tij për të qëndruar kundër atij sistemi që ne e kemi ngritur në Shqipëri qeverisja me oligarkë, mendoj që është një shpresa për këto katër vite, anën negative i shikoj tek rritja e rrezikut të autoritarizmit nga ana e Albin Kurtit që e shikoj se si funksionin partia si dhe në përgjithësi e ndërtuar gjithçka mbi kultin e tij, qëndrimi i tij është problematik, mund të kënaq krenarinë kombëtare dhe nevojën që e ka Kosova për me u konsolidua, ana tjetër e medaljes sidomos në kohën që po jetojmë kërkon më shumë fleksibilitet dhe bashkëpunim me të tjerët me opozitën që nuk e shikoj, kjo fitorja e vetëm mund ta mbushi me krenari, ka dobësitë e veta”, ka deklaruar Lubonja në emisionin “Mesditë” në Tëvë1.
