Komisioni Qendror i Zgjedhjeve ka njoftuar se procesi i numërimit të votave të kandidatëve për deputetë dhe verifikimi i votave të subjekteve politike do të fillojë sot në orën 12:00.
Sipas njoftimit, të gjithë materialet zgjedhore janë pranuar gjatë natës në Qendrat Komunale të Numërimit për t’u përpunuar nga ekipet përkatëse.
Ndërkohë, kryetari i KQZ-së, Kreshnik Radoniqi, ka sqaruar se shpallja e rezultateve përfundimtare do të bëhet pasi të numërohen edhe votat me kusht, ato të personave me nevoja të veçanta dhe të diasporës.
Ndryshe, Lëvizja Vetëvendosje ka arritur fitore bindëse në zgjedhjet e parakohshme të së dielës.
Sipas rezultateve preliminare të Komisionit Qendror të Zgjedhjeve, LVV-ja ka rritjen më të madhe me 49 për qind të votave ose mbi 429 mijë vota, 7 për qind më shumë krahasuar me zgjedhjet e 9 shkurtit, pa i llogaritur votat nga diaspora, votat me kusht dhe ato të personave me nevoja të veçanta.
Në vendin e dytë renditet PDK-ja me 21,16 për qind, derisa rënien më të madh e ka pësuar Lidhja Demokratike duke rënë nën 14 për qind./teve1.info/
