Kandidati për deputet nga radhët e Partisë Demokratike të Kosovës (PDK), Genc Prelvukaj, ka deklaruar se kjo parti është në trajektore të qartë rritjeje, duke u bazuar në trendin e votave dhe rikuperimin e shpejtë pas rënieve nga zgjedhjet e mëparshme.
Sipas Prelvukajt, trendi i rritjes do të konfirmohet shumë shpejt.
“PDK-ja është në rritje. Është në trajektore të rritjes, sepse e dimë në bazë të numrit të votave dhe tani besoj që trendi i rritjes do të konfirmohet pas dy ditësh. Nuk kisha nxitua me konstatua që ne nuk rritemi më shumë se 200 mijë vota”, deklaroi ai në emisionin “Këndi i Debatit” në Tëvë1.
Ai theksoi se PDK ka kaluar një periudhë rënieje, por ka shënuar rikuperim të shpejtë, duke e cilësuar këtë si trend pozitiv dhe të qëndrueshëm.
“Ne kemi pasur rënie të votave dhe një rikuperim shumë të shpejt. Pra, do të thotë se është një trend i rikuperimit dhe kur do të ndalet do të bëjmë bashkë analizën. Edhe në Prishtinë e kemi pasur rritjen e trendit të votave, pra është trend pozitiv”, potencoi Prelvukaj.
Prelvukaj theksoi gjithashtu se PDK po shënon rritje edhe në diasporë, ku sipas tij, po zgjerohet baza e mbështetjes përmes themelimit të degëve dhe nëndegëve të reja.
“PDK-ja ka treg të votës në diasporë dhe vazhdon ta rrisë atë. Kjo është evidente, pasi po themelohen degë dhe nëndegë të reja”, përfundoi Prelvukaj. /teve1.info/
