Me 10 vjet burgim është dënuar Slagjan Trajkoviq, nën akuzën për “Krime lufte kundër popullatës civile”.
Ndaj tij u mor vendimi të premten në Gjykatën Themelore të Prishtinës, e ku ai akuzohet se ka kontribuuar në vrasje, bastisje, rrahje, maltretim, torturë, trajtim mizor e çnjerëzor.
Sipas aktakuzës mesditën e 6 prillit 1999, forcat serbe ku pjesë ishte edhe Trajkoviq kishin rrethuar fshatin Reznik të Vushtrrisë, duke bërë ofensivë ndaj fshatit dhe vrarë civilë.
Këtë moment e ka ende të freskët në kujtesë, Sylejman Mustafa në këtë fshat i cili tregon për të bëmat e Trajkoviqit.
“Dy në traktor e katër në kerr, nana si u dal 20 metra prej shpisë fëmijët në oborr kanë qenë ky me kerr dhe u dalë nana edhe i kanë thënë ‘marke’, ka thënë nëna spo di qa po thu, ‘marke’ dhe s’kanë pasë tjetër dhe e kanë vra në prezencë të tre fëmijëve të vogël, unë për dritare e kam përcjellë sjam kon në oborr”, thotë dëshmitari i krimeve të luftës.
Po ashtu, ai tregon se si e kishte shpëtuar kufomën e babait ende pa ia djegur nga i dënuari për krime lufte.
“Babën e kanë gjetë në shtëpi, baba e ka pasë kamën e thyme, edhe e kanë vra i kam nij tri pushkë, edhe e kanë kallë shtëpinë, u kallë kufoma por unë e kam shpëtuar kufomën e babës pa djegë… Janë shku te haxhi Osmani, plaku 82 vjet, edhe e kanë vra edhe haxhi Osmanin në oborr, janë kthy në atë rrugë kah shtëpia jeme apet, janë shku e kanë vra edhe hoxhën në Vërrnicë”.
Mustafa i cili ka paditur Trajkoviqin, thotë se nuk janë të mjaftueshme këto dënime krahasuar me krimet e kryera.
“Shumë pak, ky është terrorist kriminel shumë i keq, këtë e njoh prej fëmijërisë, ky në çdo aksion me vra njerëz, me kallë shtëpi, me plaçkitë, me rreh, ka marrë pjesë. Ka qenë i veçantë, janë kanë, kanë pasë vendet në Novolan, Vërrnicë, Devarë, Mihaliq dhe Prolluzhë”.
Në atë ditë, forcat serbe kishin vrarë nëntë anëtarë të familjes Ujkani, ku pas vrasjes, trupat e tyre janë djegur bashkë me shtëpitë.
Më tej thuhet se më datë 22 maj të po të njëjtit vit, te varrezat e qytetit të Vushtrrisë, forcat serbe kanë tubuar rreth 20 deri në 40 mijë banorë civilë, i kanë urdhëruar të ulen në tokë e më pas i kanë rrahur me shkopinj të drurit.
Më pas shumë prej banorëve civilë ngarkohen në kamionë dhe dërgohen në burgun e Smrekonicës. Në të njëjtën ditë, 72 civilë janë ekzekutuar, ndërsa të dërguarit në burg janë marrë në pyetje, duke i torturuar dhe trajtuar në mënyrë çnjerëzore, e më pas dërgohen në drejtim të Shqipërisë.
