Kandidati i Lidhjes Demokratike të Kosovës (LDK) për deputet, Krenar Xhaferi, e ka cilësuar si “lëmoshë” vendimin e Qeverisë në detyrë për të ndarë shtesa prej 100 eurosh për pensionistët dhe fëmijët me rastin e festave të fundvitit.
Në emisionin “Ditari” në Tëvë1, Xhaferi ka deklaruar se kjo shumë do të shkojë kryesisht për pagesën e faturave të energjisë elektrike, për shkak të rritjes së çmimit të rrymës.
Ai ka theksuar se me programin qeverisës të LDK-së, pensionistët do të marrin pension prej 300 eurosh, duke shtuar se partia e tij synon stabilitet ekonomik dhe politik për vendin.
“Ne kemi thënë se me programin tonë qeverisës pensioni do të jetë 300 euro. Ndërsa kjo lëmoshë prej 100 eurosh për një muaj gjatë dimrit, realisht pas janarit do të shkojë për pagesën e rrymës, pasi ajo është shtrenjtuar. Skandalet e përditshme në sektorin e energjisë po ndodhin vazhdimisht dhe normalisht duhet të kritikohen”, ka thënë ai.
Xhaferi ka kritikuar gjithashtu qeverinë aktuale për, siç ka thënë ai, përkeqësimin e marrëdhënieve ndërkombëtare dhe vendosjen e Kosovës nën sanksione.
“Aty ku është LDK-ja është stabiliteti i vendit. Sot nuk i kemi as miqtë tanë, sepse janë lënduar nga veprimet e kësaj qeverie. Për sa kohë është pezulluar dialogu strategjik dhe për sa kohë jemi nën sanksione ndërkombëtare për shkak të një mendësie të tillë politike, me këtë logjikë nuk mund të ecim përpara”, ka deklaruar Xhaferi.
Ndryshe, katër ditë para zgjedhjeve të reja parlamentare, të cilat mbahen më 28 dhjetor, kryeministri në detyrë i Kosovës, Albin Kurti, ka njoftuar se Qeveria ka vendosur të ndajë shtesa të fundvitit prej 100 eurosh për fëmijët dhe pensionistët.
Ky vendim ka nxitur reagime dhe kritika nga ish-opozita, e cila e ka cilësuar këtë veprim si “blerje votash”, duke theksuar se shpërndarja e parave po bëhet vetëm pak ditë para zgjedhjeve parlamentare.
Ndërkaq, të enjten Kurti ka reaguar ndaj këtyre kritikave, duke theksuar se ndarja e shtesave është praktikë e zakonshme dhe nuk përbën risi që nga ardhja e tij në pushtet.
Ai ka deklaruar se një veprim i tillë është bërë edhe në vitet e kaluara, veçanërisht në prag të festave të fundvitit.
“Kanë qenë këto shtesa edhe vitin e kaluar, edhe para vitit të kaluar. Çdo herë para Vitit të Ri, kur kemi dimër dhe festa, ne i gëzojmë të moshuarit dhe fëmijët. Nuk ka asgjë të re në këtë aspekt. E re është qeverisja jonë, e cila do të vazhdojë edhe mandatin e tretë”, ka deklaruar Kurti gjatë një vizite në stadiumin e futbollit në Shtime./teve1.info/
